Алоуддин Мансур — 589

83:34 Энди бу (Қиёмат) Кунида иймон келтирган зотлар кофирлардан кулурлар.

83:35 Улар (жаннатдаги) сўриларда (кофирларнинг азобланишига) боқиб (ўтирурлар).

83:36 Кофирлар ўзлари қилиб ўтган қилмишларининг жазосини олдиларми? (Албатта олдилар).

84:1 Осмон ёрилган вақт;

84:2 Ва у Парвардигори(нинг ёрилиш тўғрисидаги амри)га қулоқ тутган — (мана шу амрга) лойиқ топилган вақтда;

84:3 Ер ёйилган (теп-текис бўлган) вақт;

84:4 Ва ўз ичидаги (жасадларни устига) чиқариб ташлаб, бўшаниб олган вақт;

84:5 Ва у Парвардигори(нинг ёйилиб, теп-текис бўлиш тўғрисидаги амри)га қулоқ тутган — (мана шу амрга) лойиқ топилган вақтда (ана ўша Қиёмат Кунида ҳар бир инсон ўзи қилиб ўтган амалларига рўбарў бўлур)!

84:6 Эй инсон, албатта сен меҳнат-машаққат чекиб Парвардигорингга (яъни, Унинг мукофот ёки жазосига) боргувчисан, бас, (бу ҳаёти дунёдан ўтганингдан сўнг) У зотга йўлиққувчисан.

84:7 Ана энди кимнинг номаи аъмоли ўнг томонидан берилса.

84:8 Бас, у осон ҳисоб билан ҳисоб-китоб қилинажак,

84:9 Ва ўз(ининг жаннатдаги) аҳли-оиласига шоду хуррам ҳолда қайтажак.

84:10 Энди кимнинг номаи аъмоли орқа томонидан берилса,

84:11 Бас, у ўлимини чақириб қолажак.

84:12 Ва дўзахга киражак!

84:13 Дарвоқеъ, у (ҳаёти-дунёдалик пайтида) аҳли оиласида (ўз куфру исёни билан) шоду хуррам эди.

84:14 Албатта у ўзининг ҳеч қачон (Парвардигори ҳузурига) қайтмаслигига ишонар эди.

84:15 Йўқ, Парвардигори уни шубҳасиз кўриб тургувчи эди.

84:16 Бас, Мен (қуёш ботаётган пайтда бутун уфқни қоплаб оладиган) шафаққа қасам;

84:17 Кеча ва у қамраб олган (барча) нарсага қасам;

84:18 Ҳамда тўла бўлган вақтидаги ойга (яъни, тўлин ойга) қасам ичурманки,

84:19 Албатта сизлар (эй инсонлар), табақадан табақага минурсизлар (яъни, бир ҳолдан иккинчи ҳолга кўчиб турурсизлар).[1]

84:20 Бас, нега улар иймон келтирмайдилар?!

84:21 Уларга Қуръон қироат қилинган вақтида эса (унга иймон келтиришиб, Яратганга) сажда қилмайдилар?![2]

84:22 Йўқ, улар (Қуръонни ҳам, Қиёмат Куни қайта тирилишни ҳам) ёлғон дерлар!

84:23 Аллоҳ эса улар ичларига солиб яшираётган нарсаларини (яъни, куфрларини, иймонсизликларини) жуда яхши билгувчидир!

84:24 Бас, (эй Муҳаммад алайҳис-салоту вас-салом), сиз уларга аламли азоб «хушхабари»ни беринг!