Шамсуддин Хакимов — 596

92:10 Биз ага түйшүктүү жолго түшүүнү жеңил кылабыз.

92:11 (Тозокко) оңкосунан сайылган убакта (кызганган) мал-мүлкү ага пайда бербей калат!

92:12 Албетте, (адамдарды) туура жолго баштоо Бизге гана таандык иш.

92:13 Аныгында, Акырет (жашоосу) да, Дүйнө (жашоосу) да Биздин ыктыярыбызда.

92:14 Мен силерди алоолонгон оттон эскерттим.

92:15 Ал отко шору каткан адам гана кирет.

92:16 Ал (Исламды) жалган деп (чындыктан) жүз бурган.

92:17 Андан (тозоктон) такыба киши ыраак болот.

92:18 Ал мал-мүлкүн (Аллах жолунда) берип, (өзүн сараңдыктан) тазалаган киши.

92:19 Ал адамда эч ким үчүн (ордуна) сыйлык кайтарыла турган жакшылык жок.[1]

92:20 (Ал жасай турган жакшылыктардын бардыгы) эң жогорку Раббисинин ыразычылыгы үчүн гана (жасалат).

92:21 Жакында (Аллах аны чоң сыйлык менен сыйлайт. Ошондо ал дагы Раббисинен) ыраазы болот.

93:1 Шашке маалына ант!

93:2 Тынч – караңгы түнгө ант!

93:3 (Оо, Мухаммад!) Раббиң сени таштаган жок жана (сага) ачууланган жок.

93:4 Сен үчүн Акырет (жашоосу) абалкысынан (дүйнө жашоосунан) жакшыраак.

93:5 Раббиң сага жакында (сыйлыктарын) берет. Анан сен ыраазы болосуң.

93:6 Ал (Аллах) сени жетим абалда таап, андан кийин башпаанек бербеди беле?[1]

93:7 Жана (Аллах) сени адашкан абалда таап,[1] андан кийин Туура Жол көргөздү го!

93:8 Жана (Раббиң) сени кембагал абалда таап, андан кийин бай кылды.

93:9 Эми, сен жетимге каарыңды төкпө.

93:10 Жана сураган адамга орой мамиле кылба.[1]

93:11 Эми, сен Раббиңдин нээматтары жөнүндө сүйлө.[1]

94:1 (Оо, Мухаммад!) Биз сенин көкүрөгүңдү кеңейтпедикпи?[1]

94:2 Сенден күнөө(лөрү)ңдү алып салдык.