Шамсуддин Хакимов — 582

78:1 Алар (бири-биринен) эмне жөнүндө сурашууда?[1]

78:2 Улук Кабар жөнүндө.

78:3 Алар ал (Улук Кабар) жөнүндө талашып-тартышышат эле.[1]

78:4 Жок, андай эмес! Жакында билип алышат!

78:5 Дагы бир ирет андай эмес! Жакында билип алышат.

78:6 Биз силерге жерди жайылган (төшөк сыяктуу) кылып койбодукпу?!

78:7 Тоолорду (бекем) казыктар (сыяктуу кылып жаратпадыкпы?)

78:8 Жана Биз силерди жуп-түгөй[1] кылып жараттык.

78:9 Уйкуңарды (денеңер үчүн) ырыхат кылдык.

78:10 Түндү (силерге) кийим (сыяктуу) кылдык.

78:11 Күндүздү жашоо үчүн жараттык.

78:12 Жана силердин үстүңөргө бекем жети (кабат) асманды куруп,

78:13 ысык-нурлуу чыракты (күндү) жараттык.

78:14 Жана (силерге) булуттардан мол суу түшүрдүк,

78:15 чыгарып берүү үчүн дан азыктарды жана өсүмдүктөрдү.

78:16 Жана да калың бак-бостондорду.

78:17 Албетте (ыймандуу менен каапыр) ажыратыла турган (Кыямат) күн (Аллах тарабынан) белгиленген убакыт.

78:18 Ал күнү Сур (чоор) тартылат. Анан силер топ-топ болуп (Раббиңерге сурак бергени) келесиңер.

78:19 (Кыямат күн башталганда) асман ачылып (жарылып) эшиктер (пайда ) болот.

78:20 Жана тоолор (ордунан) учурулуп, закым болуп калат!

78:21 Албетте, тозок күтүп туруучу (жана)

78:22 чектен чыккан адамдар үчүн кайтып баруучу орун!

78:23 Алар анда кылымдар бою турушат.

78:24 Ал жерде не салкындык не суусундук татышпайт.

78:25 Болгону (тозокулардын денесинен аккан) сасык ириң жана (ичегилерди тилип, үзүп жибере турган даражадагы) кайнак суу (менен гана “азыктанышат”)

78:26 (Бул – күнөөлөрүнө) ылайык жаза!

78:27 Алар (Акыреттеги) эсеп – китепке ишенишпеген.

78:28 Жана Биздин аяттарыбызды ачык түрдө жалганга чыгарышкан.

78:29 Биз бардык иштерди тизмектеп, китеп кылып жазып койгонбуз.

78:30 Эми, (жазаңарды) таткыла! Биз силерге азапты гана көбөйтөбүз!