Abubakar Mahmoud Gumi — 521

51:7 Inã rantsuwa da samã ma'abũciyar hanyõyi (na tafiyar taurãri da sautin rediyo).

51:8 Lalle kũ, haƙĩƙa, kunã cikin magana mai sãɓa wa juna (game da Alƙur'ani).

51:9 Anã karkatar da wanda aka jũyar (daga gaskiya).

51:10 An la'ani mãsu ƙiri-faɗi.

51:11 Waɗanda suke shagala a cikin zurfin jãhilci.

51:12 Sunã tambaya: "Yaushe ne rãnar sakamako zã ta auku?"

51:13 Ranar da suke a kan wuta anã fitinar su.

51:14 (A ce musu): "Ku ɗanɗani fitinarku, wannan shĩ ne abin da kuka kasance kunã nẽman zuwansa da gaggãwa."

51:15 Lalle mãsu taƙawa, sunã a cikin lambunan itãce da marẽmari.

51:16 Sunã mãsu dĩbar abin da Ubangijinsu Ya bã su. Lalle sũ, sun kasance mãsu kyautatãwa a gabãnin haka (a dũniya).

51:17 Sun kasance a lõkaci kaɗan na dare suke yin barci.

51:18 Kuma a lõkutan asuba sunã ta yin istigfãri.

51:19 Kuma a cikin dũkiyarsu akwai hakki ga (matalauci) mai rõƙo da wanda aka hana wa rõƙo.

51:20 Kuma a cikin ƙasã akwai ãyõyi ga mãsu yaƙĩni.

51:21 Kuma a cikin rãyukanku (akwai ãyõyi). To, bã zã ku dũbã ba?

51:22 Kuma a cikin sama arzikinku (yake fitõwa) da abin da ake yi muku alkawari.

51:23 To, kuma Ina rantsuwa da Ubangijin sama da ƙasã, lalle shĩ (abin da ake yi muku alkawari), haƙĩƙa gaskiya ne, kamar abin da kuka zamo kunã karantãwa na magana,

51:24 Shin, lãbãrin Bãƙin Ibrãhĩm, waɗanda aka girmama, ya zo maka?

51:25 A lõkacin da suka shiga gare shi, sai suka yi sallama; ya ce "Aminci ya tabbata a gare ku, mutãne bãƙi!"

51:26 Sai ya jũya zuwa ga iyãlinsa, sa'an nan ya zo da maraƙi tutturna,

51:27 Sai ya kusantar da shi zuwa gare su, ya ce: "Bã zã ku ci ba?"

51:28 Sai ya ji tsõro daga gare su. Suka ce: "Kada kaji tsõro." Kuma suka yi masa bushãra da (haihuwar) wani yaro mai ilmi.

51:29 Sai matarsa ta fuskanta cikin ƙyallõwa, har ta mari fuskarta kuma ta ce: "Tsõhuwa bakarãriya (zã ta haihu)!"

51:30 Suka ce: "Kamar haka Ubangijinki Ya faɗa. Lalle Shĩ, Shĩ ne Mai hikima, Mai ilmi."