Abubakar Mahmoud Gumi — 447

37:25 Me ya sãme ku, bã ku taimakon jũna?

37:26 Ã'a, sũ a yau, mãsu sallamãwa ne.

37:27 Kuma sãshensu ya fuskanta ga sãshe, sunã tambayar jũna.

37:28 Suka ce: "Lalle kũ, kun kasance kunã jẽ mana daga wajen dãma (inda muka amince)."

37:29 Suka ce: "Ã'a, ba ku kasance mũminai ba.

37:30 "Kuma wani dalĩli bai kasance ba gare mu a kanku. Ã'a, kun kasance mutãne ne mãsu kẽtare iyãka."

37:31 "Sabõda haka maganar Ubangijinmu ta wajaba a kanmu. Lalle mũ, mãsu ɗanɗanãwa ne."

37:32 "Sabõda haka muka ɓatar da ku. Lalle mũ, mun kasance ɓatattu."

37:33 To lalle sũ a rãnar nan, mãsu tãrayya ne a cikin azãbar.

37:34 Lalle Mũ, kamar haka Muke aikatãwa game, da mãsu laifi.

37:35 Lalle sũ, sun kasance idan an ce musu: "Bãbu abin bautãwa, fãce Allah," sai su dõra girman kai.

37:36 Kuma sunã cẽwa, "Shin, mũ lalle mãsu barin gumãkanmu ne, sabõda maganar wani mawãƙi mahaukaci?

37:37 Ã'a, yã zo da gaskiya kuma ya gaskata Manzanni.

37:38 Lalle kũ, haƙĩƙa mãsu ɗanɗana azãba mai raɗaɗi ne.

37:39 Kuma bã zã a sãka muku ba fãce da abin da kuka kasance kunã aikatãwa.

37:40 Fãce bãyin Allah waɗanda aka tsarkake.

37:41 Waɗannan sunã da abinci sananne.

37:42 Ya'yan itãcen marmari, kuma sunã waɗanda ake girmamãwa.

37:43 A cikin gidãjen Aljannar ni'ima.

37:44 A kan karagu, sunã mãsu fuskantar jũna.

37:45 Anã kẽwayãwa a kansu da hinjãlan giya, ta daga waɗansu marẽmari.

37:46 Farã mai dãɗi ga mashãyan.

37:47 A cikinta bãbu jirĩ kuma ba su zama mãsu mãye daga gare ta ba,

37:48 Kuma a wurinsu, akwai mãtan aure mãsu taƙaita kallonsu, mãsu manyan idãnu.

37:49 Kamar dai su ƙwai ne ɓõyayye.

37:50 Sai sãshensu ya fuskanta a kan sãshe, sunã tambayar jũna.

37:51 Wani mai magana daga cikinsu ya ce: "Lalle ni wani abõki ya kasance a gare ni (a dũniya)."