سورة الفاتحة

Əlixan Musayev

26:1 Ta. Sin. Mim.

26:2 Bunlar aydın Kitabın ayələridir.

26:3 Onların iman gətirmədiyinə görə özünü həlakmı edəcəksən?

26:4 Biz istəsəydik, göydən onlara elə bir əlamət göndərərdik ki, onun önündə başları itaətkarlıqla əyilərdi.

26:5 Mərhəmətli Allahdan onlara elə bir ayə gəlməz ki, ondan üz çevirməsinlər.

26:6 Onlar ayələri uydurma saydılar. Məsxərəyə qoyduqlarının xəbəri onlara yetişəcəkdir.

26:7 Yoxsa, onlar yer üzündə cürbəcür gözəl bitkilər bitirdiyimizi görmürlər?

26:8 Həqiqətən də, bunda bir əlamət vardır. Lakin onların əksəriyyəti mömin olmadı.

26:9 Bəli, sənin Rəbbin Qüdrətlidir, Rəhmlidir.

26:10 Bir zaman Rəbbin Musaya demişdi: “Get o zalım qövmün –

26:11 Firon xalqının yanına! Onlar qorxmurlarmı?”

26:12 Musa dedi: “Ey Rəbbim! Qorxuram ki, onlar məni yalançı hesab edələr,

26:13 belə olduqda ürəyim sıxılar, dilim də söz tutmaz. Buna görə Haruna da vəhy göndər.

26:14 Onların məndən əvəzini çıxmaq istədikləri bir günahım da var. Buna görə məni öldürəcəklərindən qorxuram”.

26:15 Allah dedi: “Xeyr, bu mümkün deyil! İkiniz də möcüzələrimizlə onların yanına gedin! Şübhəsiz ki, Biz də sizinləyik, hər şeyi eşidirik.

26:16 Fironun yanına gedib deyin: “Biz aləmlərin Rəbbinin elçiləriyik!

26:17 İsrail oğullarını bizimlə birgə burax!”

26:18 Firon dedi: “Biz səni körpə ikən götürüb saxlayıb boya-başa çatdırmadıqmı? Sən ömrünün bəzi illərini bizimlə yaşamadınmı?

26:19 Elədiyin pis əməli də elədin. Doğrudan da, sən bir nankorsan!”